سيد عبدالحفيظ – حول رحيله عن منصب مدير الكرة بالأهلي
سيد عبدالحفيظ تحدث عن لقائه الأخير مع الكابتن محمود الخطيب قائلاً:
“المقابلة كانت عادية جدًا، حسيت كأني لسه موجود في النادي من يوم واحد، والأهلي هو بيتنا سواء أنا موجود أو مش موجود. كلنا اتربينا على خيره ماديًا واجتماعيًا، وأنا شخصيًا معروف دلوقتي بسبب الأهلي.”
وعن مستقبله قال:
“مش هقدر أتكلم دلوقتي قبل ما يخرج إعلان رسمي. لو ربنا أراد خير هيمشي الحال، ولو لأ، فأنا موجود دايمًا علشان أساعد من أي مكان.”
أما عن إمكانية ترشحه لمجلس الإدارة فأوضح:
“قد يكون عندي نية للترشح، بس إيه اللي ممكن يحصل محدش يعرف. دوري دايمًا إني اجتهد وأكون جزء من الحل، عمري ما كنت المشكلة ولا هكون في مشكلة مع الأهلي، أنا دايمًا مساعد أو عنصر في الحل.”
عن الخلاف مع الكابتن محمود الخطيب:
“أنا ما بنساش الخير اللي اتعمل معايا، وبحاول دايمًا أحمل المعروف. خلافي مع الكابتن الخطيب ماكانش خلاف بالمعنى، كانت مجرد رؤية. كابتن الخطيب هو اللي رشحني للمنصب وقال لي إنه واثق فيّ ومقتنع إني هكون نموذج ناجح، وده شيء ما يقدرش أي خلاف يغطي عليه.”
عن صمته بعد الرحيل:
“أنا بتعامل مع الأهلي كأنه بيتي، واللي فيه زي أهلي الكبار. عمري ما أخدت الأمور بشكل شخصي، كنت دايمًا ببص لمصلحة المكان. اللي بيحب الأهلي بيخدمه من أي مكان حتى لو مش موجود جوه النادي. يمكن الناس شايفة إن الخير مش في وجود سيد عبدالحفيظ دلوقتي، بس أنا بحب المكان وبحب الناس اللي فيه حتى لو فيه اختلاف في الرأي. عمري ما ذمّيت في حد اختلفت معاه.”
وأضاف عبدالحفيظ:
“مهم جدًا إن الواحد يكون حذر لما ينتقد حد أو يبقى عنده حسابات شخصية. التشكيك في مرض أي شخص ده نقص في أبشع صورة. اللي يهمنا دلوقتي إن الأجواء ماتكونش ملتهبة، والحقيقة إن الوضع مش ملتهب قبل القمة، لإن الفريقين مش في أفضل حالاتهم.”