باسم مرسي: بعض المدربين كانوا عايزين يكسروني نفسيًا.. وعمري ما افتعلت أزمة
أكد باسم مرسي مهاجم الزمالك السابق، إنه عمره ما كان من اللاعبين اللي بيعملوا مشاكل بسبب عدم المشاركة، مشيرًا إلى إنه كان دايمًا بيسيب القرارات الفنية للمدرب من غير ما يدخل في أزمات أو صدامات مباشرة.
وقال باسم مرسي في تصريحات تليفزيونية:
“مكنتش بعمل مشاكل للمدربين، وعمري ما قولت لمدرب أنت مبتلعبنيش ليه، لأن في مدربين كانوا عايزين يكسروني نفسيًا، لكن عمري ما دخلت في مشكلة مباشرة مع أي مدرب”.
وأضاف مهاجم الزمالك السابق إنه كان دايمًا بيتكلم باللي يمليه عليه ضميره، وده تسببله في أزمات كتير خلال مشواره، لكنه في نفس الوقت عمره ما تجاوز مع أي مدرب اشتغل معاه.
وتابع:
“كل المدربين واللاعبين اللي اشتغلت معاهم كانوا بيقولوا إني من أكتر اللاعبين التزامًا في التدريبات، ودايمًا كنت بتمرن بشكل قوي جدًا”.
وكان باسم مرسي قد تحدث في وقت سابق عن فرص الزمالك في المنافسة على لقب الدوري الممتاز هذا الموسم، مؤكدًا إن الفريق قدم مستويات قوية جدًا فرضت احترامه على الجميع، رغم توقعات البعض بتراجع الفريق للمنافسة على مراكز متأخرة.
وأشار إلى إن لاعبي الزمالك “ادوا درس للجميع” بالأداء اللي ظهروا بيه خلال الموسم الحالي، سواء الفريق توج باللقب أو لأ.