أزمات وأسرار الأهلي مع عمر كمال: رحيل، خلافات مع حسام حسن، ومشاكل المشاركة

تصريحات عمر كمال خلال مقابلة على قناة اون سبوت:

الرحيل عن الأهلي

جالي كذا عرض الفترة اللي فاتت وكابتن وليد صلاح الدين ومستر توروب قعدوا معايا وقالولي محتاجينك في الفريق الفترة الجاية معانا وهيبقى ليك دور كويس وهتشارك ومش عايزينك تمشي ولا تفكر. قلت لهم مش عاوز امشي، أنا جاي والأهلي رغبتي الأولى والأخيرة وعاوز أكمل باقي مسيرتي في الأهلي.. بس لقيت أن مليش فرص لعب كبيرة وعاوز ألعب كأس العالم مع المنتخب، ده السبب الأساسي لطلب الرحيل.

قعدت مع توروب وكابتن وليد صلاح وقالولي الراجل عاوزك تكمل.. توروب قالي أنا مبتكلمش مع أي لاعب بس انت من الشخصيات اللي بحب أتكلم معاها لانك لاعب بروفيشنال سواء بتلعب أو لا بتتمرن كويس، ولو مبتلعبش مبتتكلمش ولا بتعمل مشاكل وبحبك على المستوى الشخصي.

قلت له ده واجبي واللي المفروض أعمله لان معنديش حاجة أعملها غير التمرين والمشاركة دي ترجعلك.. توروب قالي اسكت متتكلمش ومش عاوزك تمشي من النادي وعاوزك معايا وياريت تقفل الموضوع ده، قلت له خلاص الموضوع منتهي، أنا كلمتي واحدة ومش هفتح قصة الرحيل.

بعديها بأسبوع فوجئت بكابتن علي ماهر بيكلمني وقالي الأهلي بيخلص مروان عثمان وقلت له مش هسيب مروان عثمان غير لما أخد عمر كمال.. وهو ممكن ميبقاش محتاجني، ويبقى عنده لعيبة أحسن مني، بس عاوز يرجعني للمشاركة من تاني.

قلت لكابتن وليد صلاح معنديش مشكلة أطلع إعارة طالما الأهلي محتاج مروان عثمان وأنا مقدر احتياجات الأهلي، وكابتن وليد استغرب من رد فعلي.. لكن طالما هحل أزمة للنادي معنديش أي مشكلة خالص.

المنتخب والعلاقة مع حسام حسن

مابروحش منتخب مصر بسبب الخلافات مع كابتن حسام حسن؟ دي قصة وانتهت وكابتن حسام حسن جابني في معسكر واتكلمنا والموضوع كان سهل وبسيط واحتواني الفترة دي وكان بيتكلم معايا كويس جدًا وقال طول ما أنا بتلعب كويس أنا هضمك معايا .. وكابتن حسام عنده حق ماهو أنا مبلعبش .. أي مدرب هيبقى عاوز ياخد اللاعب اللي بيشارك.

علاقته باللاعبين

علاقة بإمام عاشور: ده ابني .. أنا على تواصل معاه على طول وآخر تواصل من ساعتين .. وده كواليتي مشفتهوش في حياتي، لاعب راجل وقوي وسريع ودريبلنج وباصير وبيسجل .. إمام أنا بتعامل معاه على إنه أخويا الصغير أو طفل .. ومش هتكلم على اللي حصل لان السوشيال ميديا بتحب الكلام الكتير وميعرفوش إيه الصح والغلط وكل واحد بيجتهد .. ولما اتطمنت عليه عرفت إنه تعبان وسخن فعلاً .. إمام عاشور ده حتة الماظ لازم نستثمر فيها ونستغلها .. وفي البيت اتلخموا لما تعب وقالوا ده ممكن يأثر عليه تاني بعد الفيروس اللي اتصاب بيه والموضوع متمش ادارته صح .. أنا متأكد إنه هيصلح الدنيا .. وحسب معرفتي بتوروب الراجل هيسامحه جدًا لانه مبيشيلش من حد ودايمًا بيقول أنا كنت لاعب كورة وعارف كل لاعب كورة بيمر بإيه.

محمد علي بن رمضان من أحسن اللعيبة اللي شوفتها في وسط الملعب .. هو اللي عمل لي الجول ده .. قبل الماتش ده كان عارف الضغط اللي أنا فيه ولقاني قاعد على جنب بقرا قرآن، قال لي ياخويا سيب المصحف دقيقة .. وانا نادرا لما أسيب المصحف لما حد يكلمني .. قال مش عاوز منك غير إن لما الكورة تبقى معايا أجري وهو هشوفك وألعبها لك قدام الجون.

نفسي أفشة وكهربا يرجعوا الأهلي .. أفشة اتظلم وده لاعب جامد جدًا ويفيد أي فرقة.

المواقف الشخصية والمهنية

قبل كده حصلت شدة ملعب بيني وبين حسين الشحات في التمرين .. توروب متكلمش وتاني يوم عمل اجتماع واتكلم معايا بعد التمرين وقال لي أنا عارف شخصيتك وعارف إنك مش انت اللي كنت في الموقف ده وانا كنت لاعب كورة وعمري ما هاخد قرار في أي حاجة لان دي كورة وده طبيعي .. هو متفهم جدًا وأنا بحب الراجل ده لأنه إنسان .. أنا ملعبتش معاه كتير بس هو إنسان .. بيعرف يتعامل مع اللعيبة كويس جدًا وعارف يمتص غضبك إمتى وعارف إمتى متضايق فيتجنبك وإمتى مبسوط فيكلمك .. راجل ذكي.

تقييم المدربين والمحترفين

اشتغلت مع كولر وريبيرو وتوروب .. مش هقول من الفرقة لان أنا جيت على كولر في شهر يناير، اللي حسيت عنده حاجة رغم إن مبلعبش كتير هو توروب، أه والله العظيم، الراجل ده كل يوم يفضل يشتغل باستمرار على نفس الجمل المعينة، كل يوم، ولازم تعمل الحاجات اللي قالك عليها مفيش جدال، بشوفه عنده حاجة وبيقدمها للنادي، ده أكتر واحد حسيت إني استفدت منه.

ريبيرو مدرب كويس جدًا بس كان عاوز يطبق طريقة مش هتبقى موجودة في الدوري المصري وهي طريقة برشلونة يبقى كل لعبك من جوه، والدوري المصري أصلا المساحات ضيقة جدًا مش زي أوروبا، كان عاوز ينفذ ده، مفيش لعب من بره ومينفعش الباك ولا الوينج يعمل كروس، ممنوع، منجحش في الحتة دي لأنه ممكن مكانش فاهم الدوري المصري ماشي إزاي.

المواقف الساخنة مع الجماهير

مابهمنيش النقد بس مقبلش إن انت متقدرش مجهود اللاعب اللي بيعمله .. ماتش باتشوكا ده من أحسن الماتشات اللي لعبتها في الأهلي وفقًا لشركة تحليل الأداء اللي أنا متعاقد معاها .. أنا شوفت ده بنفسي .. والناس اللي بتفهم كورة قالولي كده .. بس هو بيبقى توفيق من ربنا البلن ده .. ابراهيم دياز مثلا ضيع واحدة في فاينال أمم أفريقيا رغم إن المغرب بقالها 50 سنة مبتاخدش البطولة .. معنديش مشكلة أتقبل النقد بس متتجاوزش .. بالنسبالي اوعى في حياتك تغلط في الأهلي أو تقلل من مجهودي .. لو مكاني مش هتقبل حد ينفخ في ودنك لانك هتبقى شايل ضغط كبير جدًا .. أنا قولت إيه ده هو انتوا بتحاسبوا لاعب الكورة بالقطعة.

الانتقالات وصفقة الزمالك

أنا لاعب في الأهلي وتحت أمر الأهلي وإن شاء الله أرجع .. لكن مبحبش أسبق الأحداث كل خطوة في وقتها لان الكورة دلوقتي احتراف، معظم لعيبة الأهلي في الزمالك ومعظم لعيبة الزمالك في الأهلي والموضوع مش هيبقى على قد إني هروح من الأهلي لـ الزمالك، لا هل أنا هروح من الأهلي لأي فرقة تانية نسبة اللعب بتاعتي هتبقى كويسة وماديًا هبقى كويس ومرتاح ولا لا .. ده اللي هفكر فيه مش أكتر.

صفقة زيزو كانت بالنسبة لي ولينا كلنا مفاجأة .. أكتر لاعب متوقعناش إنه ييجي.

لحظات الفخر

أكتر لحظة بفخر بيها مع الأهلي؟ يوم ما بنبقى متعادلين أو خسرانين وأنزل أجيب جول .. عمري ما أنسى أسستي لأفشة قدام سموحة وحسم الدوري .. ولما نزلت قدام بلدية المحلة وسجلت وصنعت وكسبنا.

تقييمات أخرى

أسوأ محترف شاهدته في الأهلي؟ مشوفتش محترف وحش في الأهلي.

أفضل حارس في مصر؟ محمد بسام، مبيدخلش فيه أجوال في التمرين.

أفضل مدير كرة اتعاملت معاه؟ محمد رمضان، ده برة المقارنة ربنا يكرمه وبيجبر بخاطره زي ما كان بيجبر بخاطري.

رسالتي لإمام عاشور: استثمر كل دقيقة في حياتك في الملعب .. خليك زي ما كنت في أول فترة كده قريب من ربنا.